2022 թվականի մայիսից Թբիլիսիի մասնավոր «Վիվամեդ» կլինիկայում գտնվող Վրաստանի նախկին նախագահ Միխայիլ Սաակաշվիլու ընդհանուր վիճակը բարելավվել է: Այս մասին «Իմեդի» հեռուստաալիքի եթերում ասել է կլինիկայի տնօրեն Զուրաբ Չխայիձեն: «Սաակաշվիլու ընդհանուր վիճակը բարելավվել է: Սակայն լաբորատոր հետազոտությունների արդյունքներին պետք է ուշադիր լինել: Նրա ճնշումը պարբերաբար բարձրանում է: Այս փուլում մենք կարծում ենք, որ հիվանդը բավարարում է բոլոր այն չափանիշներին, որոնք անհրաժեշտ են հիվանդանոցում բուժումը շարունակելու համար»,- ասել է Չխայիձեն: Վրաստանի ընդդիմադիր «Հանուն Վրաստանի» կուսակցությունն ավելի վաղ արդարադատության նախարարությանը կոչ է արել նախկին նախագահին բանտ տեղափոխել: Կուսակցությունում նշել են, որ Սաակաշվիլին լավ տեսք ունի, առցանց միանում է իր դատավարություններին և զբաղվում քաղաքական քարոզչությամբ: |