Բաշկորտոստանում հունվարի 17-ին տեղի ունեցած բողոքի ցույցերի մասնակիցների դեմ գործեր են հարուցվել «զանգվածային անկարգությունների» վերաբերյալ: Նրանց սպառնում է մինչև 15 տարվա ազատազրկում: Նրանց դեմ քրեական գործեր են հարուցվել ՌԴ Քրեական օրենսգրքի 212-րդ հոդվածով: Այս մասին հայտնել է Բաշկորտոստանի Հանրային խորհրդի ղեկավար Ռաֆայել Դիվաևը։ «Սա քրեական օրենսգրքի շատ լուրջ հոդված է՝ առանձնապես ծանր կատեգորիայի։ Զանգվածային անկարգությունները սպառնալիք են երկրի ազգային անվտանգության համար, ուստի այս հոդվածով պատիժը բավականին լուրջ է: Խորհուրդ եմ տալիս ուշքի գալ, բոլոր վիճելի հարցերը կարելի է լուծել օրինական ճանապարհով»,-ասել է նա: Ավելի վաղ բողոքի ակցիայի մասնակիցները հավաքվել են Բայմակի շրջանային դատարանի շենքի դիմաց, որպեսզի պահանջեն ազատ արձակել ակտիվիստ Ֆայիլ Ալսինովին, որին հունվարի 17-ին 4 տարվա ազատազրկման են դատապարտել «ազգամիջյան թշնամանք հրահրելու» մեղադրանքով: |