Հասարակական գործիչ Կարեն Հեքիմյանի գրառումը․ «Ցավոք, Փաշինյան Նիկոլի ձեռամբ կամ անմիջական մասնակցության արդյունքում, տարածաշրջանում որոշակի գործընթացներ այլևս անդառնալի են: Մասնավորապես` ըստ էության, սպառվել է Արցախի խնդիրը քաղաքական ճանապարհով լուծելու ռեսուրսը, գրեթե փակ է տարածքների միակողմանի զիջելու քաղաքականությունից հրաժարվելու խաղաղ ճանապարհը: Այսինքն, եթե իշխանափոխություն լինի, ապա հաջորդ իշխանությունը պետք է ելնի այն իրողությունից, որը որպես ժառանգություն կընդունի Փաշինյան Նիկոլից:
Սա պետք է բոլորը գիտակցեն: Հայաստանի հաջորդ իշխանության ղեկավար պայմանական Կիրակոսը չի կարող առանց պատերազմի Արցախը հետ բերել, Տավուշի գյուղերը չտալ, քաղաքական օրակարգից հանել անկլավների և Զանգեզուրի միջանցքի խնդիրը: Եթե իշխանությունը վերցնելու հայտ ներկայացրած որևէ քաղաքական ուժ հակառակը պնդի, ապա վստահ եղեք, որ այդ ուժի ղեկավար պայմանական Կիրակոսը տարրական շահախարդախ է:
Հաջորդ իշխանությունը կհաջողի, եթե բնակչության հետ ազնիվ լինի, հստակ ներկայացնի իրավիճակի անդառնալիությունը, օրենքով պատժի «անդառնալիության» հեղինակներին, իր ծրագրային դրույթներում մեծ դեր հատկացնի սոցիալական բաղադրիչին:
Ամեն դեպքում, անգամ հաջողելու դեպքում, հաջորդ իշխանությունը խիստ ժամանակավոր է լինելու, քանզի Փաշինյան Նիկոլի իշխանության բացասական հետևանքների արագ վերացումը բացառված է»։