Հայ գրատպության 500-ամյակին նվիրված միջոցառումների շրջանակներում Վրաստանում ՀՀ դեսպանությունը ապրիլի 10-ին Թբիլիսիի ''Հայարտուն'' կրթամշակութային կենտրոնում կազմակերպել էր ''Պատմության 36 պահապանները'' վավերագրական ֆիլմի ցուցադրությունը:

''Պատմության 36 պահապանները'' գիտահանրամատչելի, ճանաչողական, վավերագրական ֆիլմ է` համեմված գեղարվեստական լուծումներով: Ֆիլմը տալիս է բովանդակ և ամբողջական տեղեկություններ Մեսրոպ Մաշտոցի կյանքի, աշխատանքների և մեր պատմության ամենակարևոր էջերից մեկի` հայոց գրերի ստեղծման մասին և բացահայտում է մինչ օրս անհայտ հետաքրքիր փաստեր` հայկական տառերի վերաբերյալ:

''Պատմության 36 պահամանները'' ֆիլմի ռեժիսորը Հրաչյա Վարդանյանն է, ով ուսում է ստացել Հոլիվուդում` սովորելով այնպիսի հանրաճանաչ կինոռեժիսորների մոտ, ինչպիսիք են Քուենտին Տարանտինոն և Մարտին Սկորսեզեն: ''Պատմության 36 պահապանները'' ֆիլմը հեռարձակվել է նաև BBC հեռուստաընկերության կողմից: Այն նաև 2010թ. Կաննի կինոփառատոնի ընթացքում 10 ամենադիտված ֆիլմերից մեկն է, և կինոփառատոնի 9000 ֆիլմերից հայտնվել է վավերագրական ֆիլմերի լավագույն հնգյակում:

Ֆիլմի ցուցադրությանը ներկա էին Թբիլիսիի հայ համայնքի հասարակական, մշակութային և արվեստի բնագավառի գործիչներ, դեսպանության աշխատակիցներ, հոգևոր դասի և հայ համայնքի մեծ թվով ներկայացուցիչներ, ինչպես նաև հայկական կրթօջախների սաներ: