Ռուս երգիչ Իոսիֆ Կոբզոնը հայտնել է, որ նախագահ Վլադիմիր Պուտինին է նվիրել 1804 թվականի քաղաքական քարտեզ, որում Ղրիմը ներգրավված է ռուսական կայսրության սահմաններում: «Մի անգամ Ավստրիայում մտա հնամյա իրերի մի խանութ և մի քարտեզ տեսա այնտեղ ` 1804 թվականին պատկանող: Քարտեզում հստակորեն երևում էր, որ Ղրիմը գտնվում է Ռուսաստանի տարածքում: Այդ քարտեզը նվիրեցի Վլադիմիր Պուտինին»,- «ՌԻԱ Նովոստի»-ի հաղորդմամբ` այդ մասին Սևաստոպոլում հայտարարել է Կոբզոնը` «Բերկուտ»-ի հատուկջոկատայինների համար կազմակերպված համերգի ժամանակ: Կոբզոնը նշել է նաև, որ Պուտինին հորդորել է ցույց տալ հանրությանն այդ քարտեզը: Նշենք, որ Կոբզոնը զրկվել է Ուկրաինայի ժողովրդական արտիստի և ուկրաինական Դնեպրոպետրովսկ և Պոլտավա քաղաքների պատվավոր քաղաքացու կոչումներից: Հիշեցնենք, որ Ղրիմը Ռուսաստանին է միացվել 2014թ. մարտի 16-ին: |