Ինչպես ավելի վաղ հայտնել էինք, Բորիս Նեմցովի սպանության վայրում տեսախցիկները երեք մեքենա էին ֆիքսել և ըստ շրջանառվող տեղեկությունների, Բորիսի վրա կրակողները փախուստի էին դիմել սպիտակ մեքենայով:

«Life News»-ի փոխանցմամբ, քննիչներն արդեն գտել են երեք սպիտակ «Սեդան»-ները: Նրանցից մեկը պատկանել է Մոսկվայի բնակիչ Դենիս Գ-ին, ով տեղեկացրել է, որ այդ ժամերին իր մեքենայով իսկապես անցել է Մոսկվայի կենտրոնով:
Մյուս երկու մեքենաները պատկանել են տաքսի ծառայության, որը հայտարարել է, թե իր վարորդները թեև այդտեղով անցել են, սակայն ոչինչ չեն նկատել:
Քննիչները նաև հայտնել են Բորիսի սպանության գործով շրջանառվող երեք հիմնական վարկածները: Ըստ այդ վարկածներից առաջինի՝ Նեմցովին կարող էին սպանել խանդի հողի վրա, քանի որ նրա սիրուհին որոշ ժամանակ առաջ հղիության արհեստական ընդհատում էր կատարել: Երկրորդ վարկածի համաձայն՝ սպանության պատճառը Նեմցովի՝ արտասահմանյան հովանավորներից ստացվող գումարներն էին, իսկ երրորդը՝ երկրում պառակտում մտցնելու անհայտ ուժերի ցանկությունը: