Ավստրիայի խորհրդարանի քաղաքական բոլոր վեց խմբակցությունները միավորվել են՝ Օսմանյան կայսրության ներքո 1915թ. հայերի նկատմամբ իրականացված Հայոց ցեղասպանությունը դատապարտող հայտարարություն անելու համար:

Ինչպես գրում է «Der Standart» պարբերականը, փաստաթուղթը նշում է, որ Ավստրիան պարտավոր է ճանաչել այդ դաժան իրադարձությունները և դատապարտել դրանք: Այն նաև նշում է, որ Թուրքիան էլ իր հերթին պարտավոր է առերեսվել իր անցյալի մութ էջերի հետ և օսմանյան թուրքերի՝ հայերի նկատմամբ իրականացրած հանցանքը ճանաչել որպես ցեղասպանություն:

Փաստաթուղթը Ավստրիայի խորհրդարանում քննարկման է դրվելու վաղը՝ ապրիլի 22-ին:

Աղբյուրը նշում է նաև, որ ավելի քան 20 երկրների խորհրդարաններ արդեն ճանաչել են Հայոց ցեղասպանությունը և պատմաբանների մոտ առկա են մի շարք փաստեր, որոնք վկայում են, որ տեղի ունեցածը ցեղասպանություն է եղել: