Այսօր՝ օգոստոսի 15-ին, կրթական թեմայով սեմինարի ժամանակ, որի հիմնական բանախոսներն են եղել ՀՀ կրթության և գիտության նախարար Արմեն Աշոտյանը և
Կրթության ազգային ինստիտուտի փոխտնօրեն` Անահիտ Բախշյանը, քննարկվել են ոլորտին առնչվող տարբեր հիմնահարցեր:
Անահիտ Բախշյանը նշել է` որպեսզի դիմակայենք մարտահրավերներին և հասնենք եվրոպական չափանիշներով բարձրագույն կրթության, պետք է հանրակրթությունից սկսենք. «Որպես հանրակրթության ոլորտի մարդ, ծառայող, ուզում եմ խորանալ այդ մարտահրավերների վրա... Քանի դեռ քաղաքական է ԿԳ նախարարի պաշտոնը, նախարարը չի կարող հակառակ գնալ իր թիմին»:
Բախշյանն անդրադարձել է նաև ուսուցիչների աշխատավարձերի խնդրին: «Ուսուցչի աշխատավարձի մասին ինչ-որ թվեր են գրել՝ մեծ-մեծ. իրականության մեջ այդքան ստացող չկա: Առավելագույն աշխատավարձը ստանում է նա, ով դասղեկ է, մեթոդ-միավորման նախագահ է կամ գրավորների համար փող է ստանում: Դպրոցների երևի 20%-ն է, որ այդ գումարները տալիս են, մնացածներում՝ չկա»:
Այնուամենայնիվ, Անահիտ Բախշյանն ասաց, որ Արմեն Աշոտյանի հետ հրաշալի քայլ են արել: «Դա 2014 թվականի դեկտեմբերի 1-ին Ազգային ժողովում ընդունված «Հանրակրթության մասին» օրենքում փոփոխություններն ու լրացումներն են, որով Հայաստանի Հանրապետությունում կրթության քաղաքականությունը հայտարարվել է համընդհանուր ներառական»: