Այսօր` սեպտեմբերի 2-ին, աշխարհահռչակ երգչուհի, ՀՀ ժողովրդական արտիստ, Վիեննայի օպերային թատրոնի «պրիմադոննա» Հասմիկ Պապյանի ծննդյան օրն է: «Ես ուժեղ եմ, բայց ինձ թույլ եմ զգում` տեսնելով մարդկային դժբախտ ճակատագրերը: Ես տանել չեմ կարողանում անիրավությունը, հատկապես երբ անզոր եմ որևէ բան փոխել»,-մի առիթով խոստովանել է երգչուհին: Հասմիկ Պապյանն ապրում է Վիեննայում: Սոպրանոն ելույթներ է ունեցել բազմաթիվ թատրոններում, աշխարհի ամենահեղինակավոր օպերային բեմերում և համերգային սրահներում` Նյու Յորքի «Մետրոպոլիտեն» օպերա և «Կարնեգի Հոլլ», Սան Ֆրանցիսկոյի օպերա, Վաշինգթոնի Ազգային օպերա, Միլանի «Լա Սկալա», Փարիզի «Բաստիլ» օպերա, Բարսելոնի «Լիսեու» մեծ թատրոն, Մադրիդի թագավորական թատրոն, Լոնդոնի «Վիգմոր Հոլլ» և այլն: 2004-ին նա արժանացել է Հայաստանի Հանրապետության ժողովրդական արտիստի կոչմանն, իսկ 2005-ին Ամենայն Հայոց կաթողիկոս Գարեգին Բ-ի կողմից Էջմիածնում պարգևատրվել է «Սուրբ Սահակ-Սուրբ Մեսրոպ» շքանշանով` որպես «Ամբողջ աշխարհում Հայաստանի մշակութային դեսպան»։ |