Մեր իշխանությունները չեն դադարում հանրությանն ամեն օր զարմացնել իրենց գործողություններով: Այժմ էլ Սյունիքի մարզպետ Սուրիկ Խաչատրյանի որդուն` Տիգրան Խաչատրյանին են պաշտոն տվել: Նա նշանակվել է «Հայանտառ» ՊՈԱԿ-ի տնօրենի օգնական: «Զարմանլու բան չկա: Եթե Սերժ Սարգսյանը շարունակում է մնալ հանրապետության նախագահ, ապա Ս. Խաչատրյանի որդին էլ, բնական է, կարող է պաշտոններ զբաղեցնել: Դա տրամաբանական շարունակությունն է այն ամենի, ինչ որ այսօր տեղի է ունենում երկրում: Ուղղակի ամբողջ խնդիրն այն է, որ ի տարբերություն Սերժ Սարգսյանի, Սուրիկ Խաչատրյանի որդին այս Սահմանադրության շրջանակներում է նշանակվել այդ պաշտոնին, իսկ Ս. Սարգսյանի մոտ չի ստացվում շարունակել մնալ իր պաշտոնում, կամ, այսպես ասած` իշխանության, դրա համար էլ փոխում է Սահմանադրությունը»,- վերոնշյալ տեղեկությունը, ՄԱՄՈՒԼ.am-ի թղթակցի հետ զրույցում, այսպես մեկնաբանեց «Ազգային համաձայնություն» կուսակցության նախագահ Արամ Հարությունյանը: Դիտարկմանը, թե` ըստ այդ լուրերի, Տ. Խաչատրյանին այդ պաշտոնում նշանակելու համաձայնությունը տվել է Հովիկ Աբրահամյանը, Ա. Հարությունյանը նկատեց. «Հայաստանում այսօր ընդամենը մեկ մարդ է հարց լուծում: Մնացածը` հարց լուծող չեն»: Հիշեցնենք` Սյունիքի մարզպետ Սուրիկ Խաչատրյանի որդին՝ Տիգրան Խաչատրյանը, որն անցնում էր Սդղի գյոլի ծեծկռտուքի գործով, վերջերս էր ազատ արձակվել՝ «գործի մեջ նոր հանգամանքներ ի հայտ գալու» արդյունքում: |