Առաջիկայում ՆԱՏՕ-ի անդամ երկրները ծրագրում են շուրջ 4 հազար զինվորական տեղակայել Լեհաստանում և Բալթյան երկրներում՝ ամրապնդելու համար Դաշինքի արևելյան սահմանը: Այս մասին գրում է The Wall Street Journal պարբերականը` վկայակոչելով արևմտյան պաշտոնյաներին: Ակնկալվում է, որ զորքի մի մասը կտրամադրի ԱՄՆ-ն, մյուսը` Մեծ Բրիտանիան և Գերմանիան: ԱՄՆ պաշտպանության փոխնախարար Ռոբերտ Ուորքը նշել է, որ ՆԱՏՕ-ի ռազմական ներկայությունը կապված է տվյալ տարածքում «Ռուսաստանի Դաշնության ակտիվության աճի» հետ:

«Ռուսներն անց են կացրել մի քանի անսպասելի զորվարժություններ, որոնցում մասնակցել է մեծ թվով զորք՝ հենց սահմանին: Մեր տեսանկյունից՝ դա ծայրաստիճան պրովոկացիոն քայլ է»,- ասել է նա:

Իրենց հերթին ռուսական պաշտոնյաները, Wall Street Journal-ի հաղորդմամբ, հայտարարել են, որ զորավարժությունները ՆԱՏՕ-ի զորքերի աճի և Մոսկվայի հանդեպ ագրեսիվ վերաբերմունքի արդյունք են եղել:

«Մենք պասիվ դիտորդներ չենք և մենք կկիրառենք ռազմական բոլոր հնարավոր միջոցներն այս ուժեղացված և բացարձակապես չարդարացված ռազմական ներկայության վերաբերյալ»,- ՆԱՏՕ-ում ՌԴ արտակարգ և լիազոր դեսպանի խոսքերն է մեջբերել Russia Today-ը: