Նոր Մոսկվայում ՀՀ երկու քաղաքացիների` 1973թ. ծնված Էդուարդ Նշանյանի և 1970թ. ծնված Արմեն Իսրայելյանի սպանության համար Ռուսաստանի իրավապահ մարմինները կասկածում են ծագումով Հայաստանից այլ քաղաքացու, գրում է ria-ն` հղում անելով ՌԴ քննչական ծառայությանը:
«Քննիչները տեղեկատվություն ունեն կասկածյալի ինքնության մասին, որը նույնպես, ըստ նախնական տվյալների, ՀՀ քաղաքացի է»,- հայտնում է ՌԴ ՔԿ մամուլի ծառայությունը:
Նշվում է, որ ՌԴ-ում ՀՀ ՔԿ ներկայացուցիչ Իլյա Վարովը պարբերաբար տեղեկացնում է սպանության դեպքի առթիվ հարուցված քրեական գործի ընթացքի մասին:

Ավելի վաղ հայտնել էինք, որ ՀՀ երկու քաղաքացիները սպանվել են 3-5 օր առաջ: Դեպքի վայրի զննությամբ հայտնաբերվել են 5.45 մմ տրամաչափի 7 պարկուճ և 2 գնդակ։
Ձկնկուլ մականվամբ Արմեն Իսրայելյանն ու Ճուտ մականվամբ Էդուարդ Նշանյանը նախկինում աշխատել են ՀՀ ԱԺ պատգամավոր Սամվել Ալեքսանյանի մոտ: Երկու շաբաթ առաջ միասին մեկնել են ՌԴ: Դա եղել էր այն բանից հետո, երբ իրենց «հաշիվներն արդեն պարզել էին» Ալեքսանյանի հետ: