Հոլիվուդի Փառքի պուրակում տեղադրվել է հայազգի աշխարհահռչակ շանսոնյե Շառլ Ազնավուրի անունով աստղը:
«Զգացված եմ, որ ինձ հանձնեցիք այս աստղը: Ես հաճախ եմ Հոլիվուդ այցելում, շատ եմ աշխատել ԱՄՆ-ում՝ շոու-բիզնեսի հայրենիքում»,- ասել է շանսոնյեն:
Արարողության ժամանակ երգիչն իր ելույթում անդրադարձել է նաև Հայոց ցեղասպանությանը. «Ես այսօր կարող էի լինել Թուրքիան ներկայացնող երգիչ, բայց ներկայացնում եմ Ֆրանսիան: Այս ամենը ցույց է տալիս, որ ցեղասպանության իմաստ չկա, քանի որ միշտ լինում են վերապրածներ»,- նշել է նա:
Ազնավուրին է հանձնվել Լոս Անջելես քաղաքի խորհրդանշական բանալին: Արարողությանը ներկա է գտնվել նաև Ձախ Հարութը:
Նշենք, որ այսօր` հոկտեմբերի 28-ին, «Pantages» թատրոնի հարևանությամբ նախատեսված է 92-ամյա երգչի համերգը։