ebank.am ՌԼԴԿ-ի ներկայացուցիչ, պատգամավոր Միխայիլ Դեգտյարյովը ռուսներին ֆինանսական սպառնալիքներից պաշտպանելու նպատակով առաջարկել է ՌԴ-ում արգելել դոլարի շրջանառությունն ու պահպանումը, հայտնում է dni.ru-ն: Եթե նրա մշակած օրինագիծն ընդունվի, երկու տարի հետո այդ արժույթը կարող է օրենքից դուրս հայտնվել: Պատգամավորը նշել է, որ նախաձեռնությունը ԱՄՆ դոլարի կտրուկ անկման դեպքում թույլ կտա քաղաքացիներին պաշտպանել ֆինանսական ճգնաժամից: Դեգտյարյովը վստահ է, որ ԱՄՆ դոլարը փլուզման շեմին է, որի պատճառով էլ պետք է գործել այս պահից: «Եթե ԱՄՆ-ի պետական պարտքն աճի, ապա դոլարային համակարգի փլուզումը տեղի կունենա արդեն 2017թ.: Հատկապես կտուժեն այն երկրները, որոնք ժամանակին չեն ազատվել դոլարային կախվածությունից», – պարզաբանել է Դեգտյարյովը: Սակայն խնդիրներ կարող են առաջանալ վերոնշյալ նախաձեռնության հետ: Առաջինն այն է, որ Ռուսաստանը շարունակում է դոլարով վաճառել արտահանման իր գլխավոր տարրը` նավթը, որի պատճառով էլ ամերիկյան արժույթն արգելելու հիմք դեռ չունեն: Երկրորդն այն է, որ դեռ հայտնի չէ, թե ինչպես են աշխատավարձ վճարելու այն ՌԴ քաղաքացիներին, ովքեր աշխատում են արտասահմանյան ընկերություններում և աշխատավարձը ստանում են ԱՄՆ դոլարով:

Միացեք մեր ֆեյսբուքյան էջին և առաջինը տեղեկացեք ՀՀ բանկերի մասին առաջարկվող ծառայությունների և տնտեսական նորություններին