Սիրելի ընթերցողներ, գուշակեք թե քաղաքի որ մասից, որ մասն է նկարագրված նյութում:

Մեքենան դանդաղ շարժվում էր: Անիվների տակ ճրթճրթացող խուլ ասֆալտը տաքությունից գոլորշիանում էր: Մարդիկ քայլում էին տաք գոլորշին շնչելով: Մի խումբ աղջիկներ հավաքվել էին այգում, բարձրաձայն զրուցում էին: ՄԻ երաժիշտ- մուրացկան շարունակում էր իր ամենօրյա գործը՝ նվագում էր կիթառ...Երիտասարդ ծաղկավաճառը քիթը կախ նստել ու սպասում էր գնորդի: Մյուս կողմից էլ մի նկարիչ, ինչպես ամեն օր, այսօր էլ ծաղկավաճառի պես քիթը կախ նայում էր աջ ու ձախ. «Գնորդ չկա, փոխարենը բոլորը շտապում են ինչ-որ տեղ, բայց այդ ինչ-որ տեղ գնալու համար նկար պետք չէ՞», -ինքն իրեն, քթի տակ մրմնջում էր նկարիչը:Բոլորի դեմքերին մտածմունք կա. ինչ նկարի ժամանակ է, ինչ ծաղկի, բոլորը հոգսերով լցված շտապում են: Մի խումբ օտարերկրացիներ հավաքվել ու քարտեզը ձեռքներին փորձում են կողմնորոշվել քաղաքում: Մի խումբ դպրոցական երեխաներ հավաքվել են Մատենադարանի մոտ. երևի առաջին անգամ եկել են տեսնելու այդ շքեղ «հնությունը»: Փոքրիկ այգում տղան փորձում է խոսեցնել աղջկան, ով երևի մի քիչ «նազուտուզ» է անում: ՈՒսանողները բժշկական արտահագուստով հավաքվել են՝ երևի ցույց տալու, որ իրենք ապագա բժիշկներ են: Մեքենան շարունակում է կանգնել լուսամփոփի կարմիր լույսի տակ: Խանութի դիմաց բազմաթիվ ուսանողներ իրենց փոքրիկ նախաճաշն են անում, իսկ իմ համալսարանի բակում միայն մի քանի դասին չնստող տղաներ են կանգնած: Երևի նորից ուշացել եմ դասից: