Կինս իր համար գնեց կանաչ աչքեր (լինզաներ):

Հագավ, հայելու մեջ նայեց:

- Նայի՜ր, դո՞ւր է գալիս:

Սազո՜ւմ էր:

Որ թխահեր լիներ կապույտ աչքեր կգներ:

Նա սիրում է ամեն ինչ նորը:

Հաճախ, երբ նորացնում է ինչ-որ բան ու հայտնվում՝

անկեղծ ասած չեմ ճանաչում:

Ոչ մի կերպ չեմ կարողանում այդ նորացմանը սովորել

ու փողոցում ինչ-որ մեկին նմանեցնելով կնոջս -

փաթաթվում համբուրում եմ,

նրանք չեն նեղանում, որովհետև նրանք էլ փոփոխված են միշտ

ու շատ հաճախ ժպտում են…

… այ հենց այստեղ էլ հասկանում եմ, որ սխալվել եմ,

աշխարհում ոչ մեկը կնոջս նման ժպտալ չգիտի:

Այդպիսի ժպիտ ունենալու համար ոչ մեկի փողը չի հերիքի: