Փետրվարի 17-ին տեղական ինքնակառավարման մարմինների հերթական և արտահերթ ընտրություններ կանցկացվեն Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Վայոց ձորի, Տավուշի մարզերի մի շարք համայնքներում:

MAMUL.am լրատվականի թղթակիցը զրուցել է Իջևանի ավագանու անդամի թեկնածու, 22-ամյա Թաթուլ Աթաբեկյանի հետ, ով անկուսակցական է: Նշենք, որ այս համայնքում առաջադրված թեկնածուների թիվը 33 է, 2-ը՝ ՀՅԴ անդամ, 31-ը՝ անկուսակցական:

«Ավագանու ինստիտուտն Իջևանում կայացած չէ. մինչև հիմա ավագանիներն ընտրվել են ծանոթի, բարեկամի միջոցով և որպես այդպիսին, ծրագիր չեն ներկայացրել քաղաքացիներին, որպեսզի վերջինները հնարավորություն ունենան իրենց ընտրությունը կատարել՝ հիմնվելով ծրագրի վրա: Կարծում եմ՝ կարող եմ ու պատրաստ եմ իմ ներդրումն ունենալ ավագանու ինստիտուտի կայացման գործում»,- ասել է Թաթուլ Աթաբեկյանը՝ անդրադառնալով նաև համայնքում առկա, դեռևս չլուծված խնդիրներին. «Խնդիրները բազմաթիվ են, առաջնահերթ կլուծեի աղբահանության, Աղստև գետի աղտոտվածության, ինչպես նաև բազմաբնակարան շենքերի տանիքների, փողոցների, բակերի ասֆալտապատման հարցը»: Թեկնածուի խոսքով՝ կարևոր է նաև, որպեսզի ավագանու անդամը հրապարակային հաշվետվությամբ հանդես գա, որպեսզի քաղաքացիներն իմանան՝ իրենց ընտրած թեկնածուն ինչո՞վ է զբաղվել:

Տեղեկացնենք, որ Իջևանի ավագանին ունենալու է 15 անդամ: