Կառավարությունն այօրվա նիստում հաստատեց Արագածոտնի մարզում լեռնային հանգստավայրի կառուցման «ՄԱՅԼԵՌ» ներդրումային ծրագրին հավանություն տալու մասին հարցը: Էկոնոմիկայի նախարարի պաշտոնակատարի խոսքով՝ այն իր մեջ կներառի նաև զվարճանքի ու ժամանցի վայրեր: «Ենթադրվում է, որ ընկերությունը խաղատուն կառուցելու հնարավորություն կունենա ու այն կկառուցվի ոչ այն քաղաքականության տրամաբանությամբ, որը Կառավարությունը հայտարարել է ու վարում է խաղային բնագավառի հետ կապված»,- նկատեց Ֆինանսների նախարարի պաշտոնակարտը: «Եթե ճիշտ եմ հիշում՝ մեր օրենսդրությամբ կա որոշակի պայման, որ եթե հյուրանոցային բիզնեսում ներդրումն ինչ-որ թվից ավելի է, նույնիսկ Երևանում հնարավորություն է ստեղծվում նաև խաղատնային բիզնես իրականացնելու...»,- արձագանքելով՝ ասաց Նիկոլ Փաշինյանը: Արագածոտնի մարզպետ Դավիթ Գևորգյանը մտահոգություն հայտնեց նախագծի վերաբերյալ, ինչին ի պատասխան՝ Փաշինյանն ասաց. «Հնարավոր ա Ձեր ելույթից հետո ներդրումային ծրագիրն էլ տեղից չշարժվի: Ամեն որոշման հետ կապված՝ սարսափի մթնոլորտ տարածել՝ վա՜յ, էս ի՞նչ են անում, էս ի՞նչ են կառուցում, ճիշտ չէ: Կես ժամ ա քննարկում ենք, արդյունքն էտ ա՞: Հեսա կխորանանք՝ կգանք այն եզրակացության, որ հերթական ահասարսուռ դավադրությունն ա տեղի ունենում, հետևաբար քվեարկելուց առաջ մտածեք՝ ինչի օգտին եք քվեարկում և այլն»: |