Աֆրիկյան միությունը որոշել է դադարեցնել Գաբոնի մասնակցությունը կազմակերպության բոլոր գործողություններում, քանի դեռ երկրում չի վերականգնվել սահմանադրական կարգը։ Այս մասին ասվում է Աֆրիկյան միության հայտարարության մեջ, որը հրապարակվել է X սոցիալական ցանցում (նախկինում՝ Twitter)։ Աֆրիկյան միությունը նույնպես դատապարտել է օգոստոսի 30-ին Գաբոնում ռազմական ճանապարհով իշխանության զավթումը, որի արդյունքում տապալվել է հանրապետության նախագահ Ալի Բոնգո Օնդիմբան: Օգոստոսի 30-ի առավոտյան Գաբոնի մի խումբ բարձրաստիճան սպաներ երկրի գլխավոր հեռուստաալիքով հանդես են եկել նախագահական ընտրությունների արդյունքների չեղարկման և իշխանության ինստիտուտների լուծարման մասին հայտարարությամբ։ Սպաները հայտարարել են, որ իշխանությունն իրենց ձեռքն են վերցնում և ներկայացնում են երկրի պաշտպանության նախարարությունն ու զինված ուժերը։ Այս ֆոնին տեղեկություններ են ստացվել մայրաքաղաք Լիբրևիլում փոխհրաձգության մասին: |