«Այս հանրահավաքը ազդարարում է մեր սրբազան պայքարի երրորդ և վճռական փուլի մասին, որի հանգուցալուծումը ճշմարտության հաղթանակն է: Դուք անընդհատ որոշակիություն եք պահանջել: Դուք անընդհատ պահանջել եք` կապված նոր կառավարության վարչապետի թեկնածուի և օրակարգի մասին: Ինչպես նշել եմ նախորդ անգամ` այդ թեկնածուն չի կարող լինել որևէ կուսակցության կամ խմբակի անդամ: Պետք է ձևավորի անցումային կառավարություն, որը կլինի հաշտության կառավարություն: Ձևավորելով բոլոր ունակների կառավարությունը` իրենց հմտություններով, գիտելիքներով, արհեստավարժությամբ, հայրենատեր և աստվածավախ լինելով` հստակ ունենալով օրակարգային 3 ուղղություններ:

1. Ներքին հաշտություն` հիմնված արդարադատության և արդարության վրա:

2. Արտաքին հարաբերություններում առանց հակա-ների քաղաքականության` իրավիճակի ներկայիս վիճակով սառեցման, որը չափազանց դժվար է, որովհետև անսահմանափակ տեղեկատվական պակաս կա այս պահին: Ամեն գնով պետք է սառեցվի այն իրավիճակը, որում մենք գտնվում ենք: Պետք է վերադարձվեն մեր գերիները, այդ թվում` Արցախի ռազմաքաղաքական ղեկավարները: Պետք է արցախցիներն անվտանգ վերադարձի հնարավորություն ունենան: Ադրբեջանի զինուժը պետք է դուրս գա ՀՀ ինքնիշխան տարածքներից: Սահամնազատումն ու սահմանագծումը պետք է մեկնարկի խաղաղության պայմանագրի կնքումից անմիջապես հետո` հստակ քարտեզներով, ոչ թե ներկայիս նման:

3. Պատրաստել արտահերթ կամ հերթական ընտրությունները` ազատ և թափանցիկ ընտրությունները` ազատ և թափանցիկ ընտրությունների երաշխավորը լինելով»,- ասաց Բագրատ Սրբազանը: