Ռուս ընդդիմադիր գործիչ Բորիս Նեմցովի ընկերուհին` ուկրաինուհի մոդել Աննա Դուրիցկին, ով Նեմցովի սպանության ժամանակ նրա կողքին է եղել, մորը պատմել է սպանության մասին: «Նա սպասել է Նեմցովին ռեստորանում, նրանք ընթրել են և տուն ճանապարհվել: Փողոցում Անյան առաջարկել է տաքսի նստել, սակայն Բորիսը հրաժարվել է և նախընտրել քայլել: Երբ նրանք անցնելիս են եղել կամրջով, Անյան բռնած է եղել Բորիսի ձեռքն ու թրխկոցի ձայն է լսել: Բորիսը թուլացել ու ընկել է: Անյան շատ է վախեցել, ոստիկանություն է կանչել ու անմիջապես զանգահարել է ինձ: Նա հեռախոսով ասել է. «Մամա, Բորիսին սպանեցին: Նրան մեջքից են կրակել, նա ընկած է կողքիս»»,- «Ինտերֆաքս Ուկրաինա»-ին պատմել է Աննայի մայրը: Նա նաև պատմել է, որ դուստրը հաջորդ անգամ զանգահարել է հարցաքննության գնալիս: Նշենք, որ Ռուսաստանում Ուկրաինայի դեսպանատունը նոտա է հղել ՌԴ արտգործնախարարություն` պահանջով, որ ապահովեն Աննա Դուրիցկիի` Ուկրաինա վերադարձը: |