Վերջին օրերին Նեպալում գրանցված ուժգին երկրաշարժն ազդել է ընդհանուր առմամբ 8 միլիոն մարդու կյանքի վրա, իսկ 1.4 միլիոն մարդ մնացել է առանց սննդամթերքի: Այս մասին հաղորդում է «ԲիԲիՍի»-ն՝ վկայակոչելով ՄԱԿ տվյալները:

«Ընդհանուր առմամբ՝ երկրի 39 շրջանների մոտ 8 միլիոն մարդու կյանքի վրա երկրաշարժն անդրադարձել է: Ընդ որում՝ 2 միլիոնն ապրում է առավել տուժած 11 շրջաններում»,- նշվում է ՄԱԿ հայտարարության մեջ:

Աղբյուրը նշում է, որ գնալով աճում է նաև երկրաշարժի հետևանքով զոհերի թիվը: Վերջին տվյալների համաձայն՝ զոհվածների թիվը հասել է արդեն 4310-ի: Ավելի քան 8000 մարդ էլ ստացել է տարբեր ստիճանի մարմնական վնասվածքներ:

Թեև աղետից ավելի քան 50 ժամ արդեն անցել է, սակայն փրկարարական աշխատանքները դեռևս շարունակվում են: Երեկ՝ ապրիլի 27-ին, փրկարարական աշխատանքների արդյունքում փրկարարները կարողացել են ևս 60 մարդու կյանք փրկել:

Հաղորդվում է նաև, որ Նեպալում վերականգնողական աշխատանքներն ընդհանուր առմամբ ավելի քան 5 միլիարդ դոլար կարժենան: