Այսօր հրավիրած մամուլի աուլիսին քաղաքագետ Ալեքսանդր Իսկանդարյանն անդրադառնալով երկրի ներքաղաքական խնդիրներին` ընդգծել է, որ Հայաստանում ընդդիմություն չկա. «Մարդիկ, որոնք քվեարկում են ընդդիմության համար, նրա օգտին չեն քվեարկում, այլ՝ իշխանության դեմ։ Իսկ երբ մարդկանց մեծ մասը դեմ է քվեարկում, դա շատ տարօրինակ քաղաքական զարգացումների կարող է բերել: Աշնանն էլ կսկսվի նախընտրական շրջանը, որը լարված է լինելու: Առաջ կգան, այսպես կոչված, ընդդիմադիրները, մարդիկ, ովքեր իրենց անվանում են քաղաքացիական հասարակություն, բայց դրանով խնդիրը չի լուծվի, որովհետև վստահություն այլևս չկա»,- ասել է նա` հավելելով, որ կեղծ քաղաքական կազմակերպությունների ստեղծմամբ խնդիրները չեն կարող լուծվել: Քաղաքագետի խոսքով, երկրի շուրջ 80 % բնակչությունն ընդհանրապես չի վստահում ոչնչի։ «Ես կարծում եմ, որ իշխանությունների լեգիտիմությունն արդեն պլինտուսից ցածր է։ Նման պարագայում իշխանություններին մնում է ազդել մարդկանց վրա այլ մեթոդներով, կոպիտ ասած՝ գնել։ Իսկ գնել պարտադիր չէ գումարով. կարող են համոզել դպրոցների ուսուցիչներին, ասֆալտ փռել գյուղում, դուռ կամ պատուհան դնել շենքի մուտքում և այլն։ Գյուղերում դա նրանց կհաջողվի, բայց Երևանի սոցիալական կենտրոնում գտնվող մարդիկ չեն հասկանում այն ամենն, ինչ գալիս է իշխանությունից։ Ես կասկածում եմ, որ եթե կառավարությունը վաղը հանրաքվեի դնի բազմապատկման աղյուսակը, կլինեն ցույցեր նաև դրա դեմ»,- կարծիք է հայտնել Իսկանդարյանը։ |