Գիտելիքի օրվա առթիվ շնորհավորում եմ բոլոր նրանց, ովքեր նոր են մուտք դնում դպրոց, ԲՈՒՀ և ցանկացած ուսումնական հաստատություն, մաղթում եմ ստանալ ճիշտ ԿՐԹՈՒԹՅՈՒՆ, որով կապրեք արժանապատիվ կյանքով ու կբարձրացնեք ձեր ինքնագնահատականը: Ճիշտ ու լավ ԿՐԹՈՒԹՅՈՒՆԸ միայն գիտելիք չէ, ավելին է քան գիտելիքը: Դա անհրաժեշտ ու բավարար պայմանն է ապրելու և ոչ՝ գոյատևելու: Կրթված մարդը սիրում է դիմացինին, հանդուրժող է, բայց ոչ՝ հարմարվող: Շնորհավորում եմ իմ գործընկերներին՝ ուսուցիչներին, մաղթում եմ առողջություն, իմաստություն, որպեսզի նրանք համբերությամբ կրթեն մեր երեխաներին, որպեսզի իրենց օրինակով ցույց տան, թե ինչ է նշանակում արժանապատիվ ապրել, լինել հանդուրժող, միևնույն ժամանակ լինեն իրենց իրավունքների տերը: Շնորհավորում եմ տնօրեն գործընկերներիս ու մաղթում նրանց իհարկե առողջություն և իմաստություն, որպեսզի դպրոցներում ԿՐԹՈՒԹՅՈՒՆԸ աշակերտների համար լավագույնս կազմակերպեն և ուսուցիչների համար աշխատանքի արդյունավետ մթնոլորտ ապահովեն: Ուժ, եռանդ ու լավատես առօրյա եմ մաղթում բոլոր նրանց, ովքեր այսօրվանից ցանկացած կարգավիճակով կմտնեն ուսումնական հաստատություններ ու մոմի պես կայրվեն՝ լուսավորելով մեր երեխաների ապագայի ճանապարհը: Հաջողություն բոլորիդ՝ մեր սիրելի աշակերտներ, ուսանողներ, ուսուցիչներ, դասախոսներ... |