Հաղթանակի, ԼՂՀ պաշտպանության բանակի և Շուշիի ազատագրման 20-րդ տարեդարձին նվիրված եռատոն է այսօր: Բոլոր վետերանները Երևանում այցելում են ''Հաղթանակ'' զբոսայգի, որտեղ գտնվում են Մայր Հայաստանի հուշարձանը, 2-րդ համաշխարհայինի թանգարանը և անմար կրակն` անհայտ զինվորի գերեզմանին: Հայրենական մեծ պատերազմում հայ ժողովուրդը ոչ միայն ցուցաբերեց անձնազոհություն և հերոսություն, այլև հաղթահարեց իր ներսում հարյուրամյակների ընթացքում արմատներ գցած հալածվածի և թույլի, սեփական ուժերի հանդեպ թերահավատության բարդույթը: Երկուսուկես միլիոնանոց սովետահայությունը շուրջ 650.000 քաջարի զինվորներ տվեց ռազմաճակատին: Հայ ժողովրդի համար ճակատագրական էր նաև Արցախի հնագույն մայրաքաղաք Շուշիի ազատագրումը: Այն բեկումնային դարձավ ղարաբաղյան պատերազմում և նախանշեց հետագա հաղթանակների ուղին: Այսօր և’ տոն է, և’ անցյալի մասին մտորումների օր: Շուշիի ազատագրման ռազմական գործողությունը մշակման և իրականացման առումով գրեթե անթերի, հայ ռազմարվեստի մեջ եզակի ռազմական գործողություն էր, որով արմատական բեկում էր առաջացել Ղարաբաղյան ազատագրական պատերազմում:
|