Հոկտեմբերի 11-ին հ. 120 հիմնական դպրոցում հայոց լեզվի և հայ գրականության ուսուցչուհի Տ. Ազիզյանը 9-րդ դասարանցիների շրջանում անցկացրեց գիտատեսական կոնֆերանս` նվիրված «Թարգմանչաց տոնին» և Սուրբ Մաշտոցին: ՈՒսուցչուհին նշեց, որ տոնը նվիրված է հայ գրերի գյուտին, թարգմանչաց շարժմանը և մշակույթի նշանավոր գործիչներին, «Աստվածաշունչն» առաջինը հայերեն թարգմանողներին, որոնց` որպես առանձնահատուկ շնորհով օժտվածների, դեռևս վաղ միջնադարում առաքելական եկեղեցին դասել է եկեղեցու սրբերի շարքը և սահմանել հատուկ Սրբոց թարգմանչաց տոն:

Հնչեցին ելույթներ տնօրեն Գ. Հայրապետյանի, փոխտնօրենների, մ/մ նախագահի կողմից: Աշակերտների անունից շնորհակալական խոսք ասաց նաև աշակերտական խորհրդի նախագահ Գ. Ամիրխանյանը:

ՈՒսուցչուհին անդրադարձավ թարգմանչական շարժմանը, ազգային մատենագրությանը, հայ եկեղեցական երաժշտության սկզբնավորմանը:

Միջոցառումը իր տեսակով ուսանելի էր բարձր դասարանի աշակերտների համար, և բոլորը դահլիճից դուրս եկան տպավորված, քանի որ ուսուցչուհու մեղմ, հանգիստ ու խիստ հագեցած գեղեցիկ խոսքը հասավ ունկնդիրների ոչ միայն մտքին, այլև սրտին: