Զարգացած գյուղատնտեսությունը երկրի ամուր ողնաշարն է, հետևաբար առանց ագրարային ոլորտի զարգացման դժվար է պատկերացնել որևէ առաջընթաց: Մեր երկրում համակարգի զարգացումն ապահովող մասնագետների պատրաստման առաքելությունը ավելի քան 8 տասնամյակ պատվախնդրորեն ստանձնել է գյուղատնտեսական բարձրագույն կրթություն ապահովող միակ ուսումնական հաստատությունը՝ Հայաստանի ազգային ագրարային համալսարանը.

Հանրությանը կատարված աշխատանքներին, նախատեսվող ծրագրերին և իրականացվող բարեփոխումներին ծանոթացնելու լավագույն առիթ էր ապրիլի 16-ից 18-ը կայացած կրթություն և կարիերա EXPO 2014 միջազգային ցուցահանդեսը, որտեղ ուշագրավ տաղավարով ներկայանում էր նաև Հայաստանի ազգային ագրարային համալսարանը: Լինելով հանրապետության խոշոր բուհերից մեկը՝ ագրոպարենային համակարգի բարձրակարգ մասնագետների պահանջարկը լիովին բավարարելու նպատակով ագրարային համալսարանում վերջին 10-15 տարիների ընթացքում հիմնվել են 17-ից ավելի նոր մասնագիտություններ, արդյունավետորեն շարունակվում է բարեփոխումների գործընթացը, համագործակցության աշխարհագրության ընդլայնումը, նյութատեխնիկական հնարավորությունների կատարելագործումը և գիտական ներուժի հզորացումը: Շարունակելով հարստացնել իր փառավոր կենսագրության էջերը՝ Հայաստանի ազգային ագրարային համալսարանը աստիճանաբար վերածվում է տարածաշրջանային գիտակրթական կենտրոնի, որի պատրաստած շրջանավարտները անգնահատելի ավանդ են ունենում հանրապետության գյուղատնտեսության, սննդարդյունաբերության, մեքենայացման, ջրատեխնիկական շինարարության և տնտեսության այլ ոլորտների կայացման ու զարգացման գործում: