Այն, որ եկեղեցու և Ամենայն հայոց կաթողիկոսի դեմ նախաձեռնությունը ինքնաբուխ է, որևէ արտաքին ազդեցության տակ չի և ոչ մեկի կողմից չի հովանավորվում, ասվում է նախաձեռնության ամեն հավաքի ժամանակ: Այն, որ նախաձեռնության անդամները մաքուր, պարզ հավատքի տեր քրիստոնյաներ են, որոնք պարզապես ցավում են իրենց կյանքում տեղի ունեցող ամեն ինչի համար և դրանում մեղադրում են Ամենայն հայոց կաթողիկոսին և այլ ճանապարհ չունեն, քան Երևանի փողոցներում իրեն մերժելը, դա էլ է հայտարարվում նրանց հավաքներում:

Թերևս դա հնարավոր է ըմբռնել որոշակի իրավունքների կոնտեքստում: Բայց արի ու տես, որ այս ամենի մեջ կան նաև տարօրինակ կողմեր: Օրինակ` իրեն քրիստոնյա համարողն ինչպե՞ս կարող է ակնհայտ հրճվանքով վիրավորանքներ հնչեցնել, մեղադրել և այնուհետև ծափահարել իր ասածին: Իրեն եկեղեցու անդամ հռչակող մեկը ինչպե՞ս կարող է ականջալուր չլինել եկեղեցու տարբեր մարմինների կողմից տրվող բացատրություններին, չընդունել սեփական առաջնորդների դիտողությունները: Այսինքն` ակնհայտ է, որ Քրիստոս էլ իջնի, չպիտի հավատան:

Ամենից տարօրինակն այն է, որ Asekose.am-ի հավաստի տեղեկություններով Հայ եկեղեցու ռեֆորմներով «մտահոգ» նախաձեռնության քրիստոնյա անդամները դիմել են Էջմիածին քաղաքում տեղի ունեցած վերջին ցույցերի կազմակերպիչ-ակտիվիստներին, որպեսզի վերջիններս միանան իրենց ծրագրի իրագործմանը: Դատելով այս քայլից` չենք բացառում, որ նմանօրինակ այլ դիմումներ էլ կատարված լինեն տարբեր կառույցների և ուժերի: Հետաքրքիր է, թե ո՛րն է առաջարկած գինը:
Սա կարծես այնքան էլ չի վկայում նախաձեռնության ազնիվ մղումների մասին:

Գուցե նախաձեռնության շարքերում հայտնված իսկապես միամիտ հավատացյալներն անդրադառնան, թե ում են աջակցում, և հարցեր ուղղեն հարթակում կանգնած աշխարհականներին ու հոգևորականներին իրական շարժառիթների, ստվերային հովանավորների և որդեգրած քաղաքականության մասին:

Հ.Գ. Իսկ նախաձեռնության համար ՓՌ մասնագետի փնտրտուքի և նրան առաջարկվող գումարների մասին թերևս հաջորդիվ:

Հեղինակ՝

Արսեն Մաթևոսյան