2018թ-ի դեկտեմբերի 9-ին մերժիր Սերժի ՀՀԿ-ին ու նրա հետ հանցավոր կոալիցիա կազմած կուսակցություններին։
Մարտիկներ հանուն արդարության (ՄՀԱ) քաղաքական միավորումը ողջունում է Հայաստանում դեկտեմբերի 9-ին կայանալիք արտահերթ խորհրդարանական ընտրությունների անցկացումը:
Ընտրությունների վերաբերյալ մենք արդեն հանդես ենք եկել հայտարարությամբ, որը ժողովրդական մեծ աջակցություն ստացավ, ինչի համար շնորհակալ ենք մեր բոլոր համակիրենրին ու գաղափարակիցներին:
Այս արտահերթ ընտրությունները վերջնական հնարավորություն են տալիս մեկընդմիշտ ազատվել նախկին ռեժիմի անդամներից և՛ գործադիր, և՛ օրենսդիր, և՛ դատական համակարգերում: Իսկ դա էլ իր հերթին ամբողջությամբ անպաշտպան է դարձնելու նախկին ռեժիմի օրոք ապօրինաբար հարստացած ու ժողովրդին թալանած օլիգարխիային:
Հետևաբար ակնկալում ենք, որ ԱԺ արտահերթ ընտրություններից անմիջապես հետո կլինեն այնպիսի բացահայտումներ, որոնց միջոցով հայ ժողովրդից երկու տասնամյակից ավելի գողացված տասնյակ միլիարդավոր դոլարները ետ կվերադարձվեն պետական բյուդջե:
ՄՀԱ քաղաքական միավորումը վերահսկող-դիտորդի կարգավիճակում է մասնացելու արտահերթ խորհրդարանական ընտրություններին: Մեր գլխավոր խնդիրն այս ընտրություններում ժողովրդի քվեն պահելն ու օրինախախտումների բացառումն է: Մեր սկզբունքներին հավատարիմ մնալով կմնանք արդար դաշտում և կատարելով դիտորդի պարտականություններ ՝ հանդես կգանք անկողմնակալ հայտարարությամբ: Կոչ ենք անում Հայաստանի Հանրապետության բոլոր քաղաքացիներին անպայման մասնակցել ընտրություններին, սակայն ընտրություն կատարելիս առավել կարևորություն տալ տվյալ ընտրատեղամասում առաջադրված թեկնածույի ով լինելուն, այլ ոչ թե նրա կուսակցական պատկանելիությանը: Կոչ ենք անում ոչ մի դեպքում չընտրել նախկին ռեժիմին ծառայած որևէ թեկնածույի, անկախ նրանից թե որ կուսակցության ընտրացուցակում տեղ կգտնի նրա անունը: Պիտի պայքարենք և ունենանք մեր երազների Հայաստանը: Ոչ մի պաշտոնյա չի կարող միայնակ աշխատելով, հասնել այն ամենին, ինչի մասին երազում ենք ազգովի: Ամեն հայ պիտի մտածի, որ իր երկրի ճակատագիրը կախված է իր ընտրությունից, խնդիրների վերաբերյալ ունեցած իր պատկերացումից ու դրանք լուծելու իր պատրաստակամությունից: Նոր Հայաստանում չի՛ լինելու անտարբերություն, չի՛ լինելու անօրինություն, թույլ չենք տալու յուրացնել պատական միջոցները:
Ազգովի վերահսկելու ենք պետական ամբողջ համակարգի գործունեությունը, աջակցելու ենք ցանկացած խելամիտ նախաձեռնության և պահանջելու ենք անհրաժեշտ ժամկետներում գրանցել ցանկալի տրամաբանական դրական արդյունքներ:
05.11.2018 ՄՀԱ քաղաքական միավորում
