Կոտայքի մարզպետ Ռոմանոս Պետրոսյանն այցելել է Եղվարդ համայնքում գտնվող «Շահնազարյան» գինու-կոնյակի տուն, շրջել գործարանի տարածքում, զրուցել աշխատակիցների հետ, ծանոթացել պայմաններին: Գործարար ոլորտը շարունակում է մնալ Կառավարության ուշադրության կենտրոնում, և որպես կենտրոնական իշխանությունների ներկայացուցիչ տարածաշրջանում՝ Ռոմանոս Պետրոսյանը պարբերական այցերով ուշադրության կենտրոնում է պահում ոլորտն՝ իր հնարավորություններով և խնդիրներով: Նպատակն է, որ Հայաստանի մասին՝ որպես սպառող երկրի, ընկալումը վերափոխել արտահանող երկրի, ձևավորել նոր միջավայր ու նոր մոտեցումներ: Ընկերության գլխավոր տնօրեն Սամվել Շահնազարյանը մարզպետին է ներկայացրել այս պահին գործարանում իրականացվող աշխատանքների ընթացքը, ծավալները: Առաջիկայում տարածքում կբացվի նոր արտադրամաս, կգործարկվեն գինու նոր հոսքագծեր: «Շահնազարյան» գինու-կոնյակի տունը հիմնադրվել է 2005թ.-ին՝ որպես ընտանեկան ձեռնարկություն: Ընկերությունը հանդես է գալիս կոնյակի, գինու և մրգային օղիների արտադրությամբ՝ երաշխավորելով ապրանքի որակը և առաջնորդվելով հայկական գինեգործության ավանդույթներով: Գործարանը հանդիսանում է կոնյակի սպիրտի խոշոր արտահանող: Ներկայում այստեղ աշխատում են շուրջ 140 աշխատակիցներ՝ մեծամասնությունը Կոտայքի մարզից: http://kotayk.mtad.am/ |