Բաց դասի թեման՝ «Բոլշևիկյան հեղաշրջումը և Հայաստանը» Ուսուցչուհի՝ Ցողիկ Ազիզյան Դասարան՝ XI Ս/թ մարտի 5-ին Արմավիր մարզի Բամբակաշատ գյուղի միջնակարգ դպրոցի ուսուցչուհի Ցողիկ Ազիզյանը 11-րդ դասարանում կազմակերպեց բաց դաս «Հայոց պատմություն» առարկայից: Դասի թեման էր ՝ «Բոլշևիկյան հեղաշրջումը և Հայաստանը» : Բաց դասին ներկա էին դպրոցի տնօրեն տիկին Գայանե Պարոնյանը և մի խումբ ուսուցիչներ: Իր ներածական խոսքում ուսուցչուհի Ցողիկ Ազիզյանը համառոտ ներկայացրեց այն բարդ պատմական իրավիճակը, որում հայտնվել էր Հայաստանը Առաջին համաշխարհային պատերազմի հետևանքով: Այնուհետև աշակերտների օգնությամբ էլեկտրոնային գրատախտակին «Ժամանակի ուղի» մեթոդով վեր հանեց մի քանի պատմական իրադարձություններ: «Գրական խմբակ» մեթոդով ձևավորեցին երեք խմբեր, որոնց առաջադրվեց ներկայացնել թեմայի առանձին հատվածները` կազմելով թեստային առաջադրանքներ, ԳՈւՍ մեթոդով ներկայացնել «Թուրքահայաստանի մասին» դեկրետը, «Պատմական հիշողության հինգ օղակներ» մեթոդով ներկայացնել Բրեստ-Լիտովսկի պայմանագիրը: Նախապես ձևավորված «Տիգրան Մեծ» , «Աշոտ Երկաթ» և «Մեծ Հայք» խմբերը ներկայացրեցին իրենց աշխատանքները և գնահատեցին դրանք: Ուսուցիչը առաջարկեց աշակերտներին ներկայացնել այն հնարավոր քայլերը` ստեղծված բարդ իրավիճակից դուրս գալու համար: Քննարկումների արդյունքում աշակերտները հանգեցին այն եզրակացության, որ օրհասական պահերին հայ ժողովուրդը հույսը պետք ե դնի իր ուժերի վրա և կենաց մահու պայքար մղի իր երկրի ազատության և անկախության համար: |