Իսպանացի և ֆրանսիացի գիտնականները հայտարարել են, որ իրենց հաջողվել է գտնել Ֆրանսիական Մեծ հեղափոխության ժամանակ գլխատված Ֆրանսիայի թագավոր Լյուդովիկոս 16-րդի արյան հետքերը, հաղորդում է BBC ռուսական ծառայությունը: Հետազոտողները պնդում են, որ հին կտորի վրա հայտնաբերված գենետիկական նյութը համընկնում է Բուրբոնների արքայատոհմի մեկ այլ միապետի Հենրիխ 4-րդի մումիֆիկացված մնացորդների ԴՆԹ-ի հետ: Լյուդովիկոս 16-դին գլխատել են 1793 թ-ի հունվարին, և գլխատմանը եկած շատ փարիզեցիների հաջողվել է իրենց թաշկինակները թաթախել գլխատված արքայի արյան մեջ: Այդպիսի թաշկինակներից մեկը վերցված է հետազոտության համար: Ավելի վաղ այն պահպանվել է իտալական մի ընտանիքի մասնավոր հավաքածուի մեջ: Գիտնականները հույս ունեն Լյուդովիկոս 16-րդի ԴՆԹ-ն կօգնի բացահայտել միապետի, նրա հարազատների և ժառանգորդների գենային կոդը: |