ԱՄՆ-ի Կոնգրեսի Սենատի՝ Հանրապետական և Դեմոկրատական կուսակցությունների անդամները Սաուդյան Արաբիային զենքի վաճառքն արգելող օրինագիծ են ներկայացրել՝ կապված Եմենի հակամարտության և լրագրող Ջամալ Խաշոգջիի սպանության հետ: Այս մասին ասվում է ԱՄՆ-ի Կոնգրեսի Սենատի՝ արտաքին գործերի հարցերով հանձնաժողովի հայտարարության մեջ: Նշվում է, որ օրինագիծը ենթադրում է «թագավորությանը զենքի վաճառքի, ինչպես նաև Եմենում քաղաքացիական պատերազմին մասնակցող կոալիցիայի ինքնաթիռների զինման արգելքը»: Բացի այդ, օրինագիծը ենթադրում է լրագրողի սպանությանը ներգրավված անձանց նկատմամբ պատժամիջոցների սահմանում: Ինչպես ավելի վաղ հայտնել էինք, ԱՄՆ-ի Կենտրոնական հետախուզական վարչությունը թագավորության թագաժառանգ արքայազն Մուհամեդ բեն Սալման ալ Սաուդին լրագրող Ջամալ Խաշոգջիի սպանության պատվիրատու էր անվանել: |