ԱՄՆ-ը կշարունակի վճռականորեն գործել նրանց դեմ, ովքեր մասնակից են Մյանմայում ցույցերի ցրմանը։ Այս մասին ասված է պետքարտուղար Էնթոնի Բլինքենի՝ Twitter-ում հրապարակված գրառման մեջ։
«ԱՄՆ-ը կշարունակի վճռականորեն գործել Բիրմայում (Մյանմայում) մարդկանց դեմ բռնություններ իրականացնողների նկատմամբ։ Քաղաքացիները պահանջում են վերականգնել ժողովրդավարական ճանապարհով ընտրված կառավարությունը։ Մենք Բիրմայի ժողովրդի հետ ենք»,- ասել է Բլինքենը։
Մյանմայի ԶԼՄ-ների տեղեկությունների համաձայն՝ շաբաթ օրը երկրում ցույցը ցրելու ժամանակ 2 մարդ է զոհվել, 6-ը՝ վիրավորվել: «Մյանմա նաու» լրատվականի տվյալներով՝ ոստիկանությունն ու զինվորականները մարտական և ռետինե փամփուշտներ են կիրառել։
Հիշեցնենք՝ փետրվարի 1-ին Մյանմայի զինվորականները հայտարարել են 1 տարի ժամկետով արտակարգ դրություն սահմանելու և երկրի ղեկավարությանը հեռացնելու մասին՝ դա բացատրելով 2020 թվականի նոյեմբերին կայացած ընտրություններում զանգվածային կեղծիքներով: Ձերբակալվել են բարձրաստիճան պաշտոնյաներ, այդ թվում՝ նախագահ Վին Մյինը։ Զինվորականները ներկայացրել են կառավարության անդամների նորացված ցուցակը, նրանք արդեն զբաղեցրել են նախարարական պաշտոններ։