Կենտրոն վարչական շրջանի նախկին ղեկավար Վիկտոր Մնացականյանի ֆեյսբուքյան գրառումը. «Հարգելի Երևանի քաղաքապետարան և ավագանի, երբ ձգտում ենք ավելի կանաչ և կայուն Երևանի, պետք է չմոռանալ նաև մեր քաղաքի գեղագիտական և պատմական դիմագիծը պահպանելու մասին:
Երևանի Կենտրոնը պարզապես հին շենքերի հավաքածու չէ:
Չնայած ողջունում եմ էներգաարդյունավետության ուղղությամբ պետության ջանքերը և «արևային համայնք» ծրագրի իրականացման կարևորությունը, այնուամենայնիվ, կարծում եմ, որ Երևանի սրտում արևային մարտկոցներ տեղադրելիս քաղաքապետարանը պետք է գործի առավելագույն զգուշությամբ, հատկապես քաղաքի պատմական հատվածում՝ ճարտարապետական ունիկալ շենքերի և մշակութային նշանակության կառույցների տանիքներին:
Վերականգնվող էներգիայի ինտեգրումը պետք է չնսեմացնի ճարտարապետական ժառանգությունը, էսթետիկան. այդ վահանակները պետք է գրագետ ինտեգրել գոյություն ունեցող կառույցներին, այլապես դրանք էլ կլրացնեն կոնդիցիոներների ու անտեննաների շարքերը»: