Բագրատ Սրբազանը Նկարիչների և Գրողների միություններից հետո այցելեց Գիտությունների ազգային ակադեմիա։ Նրան և երթի մասնակիցներին դիմավորեցին ակադեմիայի փակ դռները հսկող ոստիկանները, որոնք խոչընդոտեցին Սրբազանի մուտքը՝ ասելով, թե թույլտվություն պետք է հարցնեն: Բագրատ Սրբազանը հրաժարվեց մտնել ակադեմիա։ Փոխարենը նրան ծափողջյուններով դիմավորեցին ԳԱԱ պատմության ինստիտուտում։ «Որքան էլ պատմությունը լինում է երեկվա մասին, այնուհանդերձ, ես պատմությունն ուզում եմ տեսնել ապագայի աչքերով, թե ինչ են ապագայում գրելու այսօրվա մասին»,- ինստիտուտի աշխատակիցների հետ հանդիպման ժամանակ ասաց Սրբազանը։
Հ․Գ Պատմության ինստիտուտում հանդիպումն ավարտելուց հետո Տավուշի թեմի առաջնորդն, այնուամենայնիվ, մտավ Գիտությունների ակադեմիա, հանդիպեց ղեկավարության հետ։