Nyut.am-ը գրում է. «Ինչպես երեկ Nyut.am-ը գրել էր, Ադրբեջանի զինվորական ղեկավարությունն իր զինվորների դիակները թաքցնում է Արցախին սահմանակից իրենց տարածքների մի քանի գինու գործարանների սառնարան-նկուղներում ու հատուկ գետնափոր պահեստարաններում: Որպեսզի ժողովուրդը չհուսալքվի, մարտերում զոհված մի քանի տասնյակ զինվորների դիակները նրանք պահում են գինու կոմբինատների սառնարաններում: Հետո օրական 3-5 դիակ տանում են հարազատներին, իբր զոհվել են հենակետում կամ հրետակոծությունից: Երեք օր առաջ Աղդամի մոտակայքում, գինու գործարաններից մեկի սեփականատերը, ով վրդովված էր, որ իր` թեկուզ չգործող գործարանը վերածել են «դիահերձարանի», որոշում է խնայել էլեկտրաէներգիայի ծախսերը: Նա «ռուբիլնիկից» անջատում է հոսանքն ու գնում տուն: Երեկ կեսօրին ադրբեջանական զինվորականները մեծ աղմուկ են բարձրացնում: Մտնելով գինու գործարանի նկուղային տարածք, նրանք անտանելի հոտ են առնում: Պարզվում է, որ երեք օր առաջ զինվորականները զոհված ադրբեջանցիների հերթական խմբաքանակն են բերել գործարան: Գործարանում գետնափոր պահեստարան կա, ուր կարող է մտնել ավտոմեքենան: «Ուրալ» մակնիշի ավտոմեքենան, թափքում 18 դիակներով, մտցնում են պահեստարան: Եվ երբ զինվորականները երկուսուկես օր անց գալիս են դիակների հետևից` դիակների նեխածության հոտից հազիվ են հետ փախչում: Այդ վիճակով անհնար էր դիակները հարազատներին հանձնելը: Եվ զինվորական ղեկավարությունը որոշում է կայացնում պահեստարանից հանել «Ուրալը» և դիակների հետ միասին այրել: Հենց գործարանի բակում էլ այրում են ավտոմեքենան, այնուհետև հետքերն ամբողջությամբ կորցնելու համար նաև պայթեցնում են: Որոշում են զոհվածների հարազատներին ասել, թե իրենց երեխաներն անհետ կորածների թվում են: Ինչպե՞ս են պատժում էլեկտրականությունն անջատած ու դիակները նեխացրած սեփականատիրոջը` հայտնի չէ: Հնարավոր է, որ նա տեղյակ էլ չէր, որ «Ուրալի» թափքում դիակներ կան: |