Այսօր` մայիսի 13-ին, Երևանի Սուրբ Գրիգոր Լուսավորիչ Մայր եկեղեցում, հոգևոր տեսուչ Տեր Անուշավան եպիսկոպոս Ժամկոչյանի տնօրինությամբ կմեկնարկի «Խոկման» արարողություն: «Խոկման» ընթացքում «Աստծո հետ հաշտություն, ինքնահաշտության ճանապարհով» թեմայով քարոզելու է Սբ. Գրիգոր Լուսավորիչ Մայր եկեղեցու «Հավատամք» կենտրոնի հոգևոր հովիվ Տեր Հակոբ քահանա Խաչատրյանը: Քարոզխոսությունից հետո «Խոկման» մասնակիցները հոգևոր երգեցողության և մոմերի լույսի ներքո իրենց ինքնահաշտության մասին խորհելու առիթ են ունենալու: Խոկումը խոնարհություն է Աստծուն, հոգու խաղաղություն, մեղքերից ձերբազատվելու ձգտում: Խոկման ընթացքում մարդիկ ավելի բարիանում են, փորձում Աստծուց մեղքերի քավություն ստանալ՝ «երկնքում գանձեր դիզելու» համար: Խոկումը նաև երկխոսություն է Աստծո հետ, որտեղ մաքրամաքուր զգացումներ են: Եվ հայտնի է, որ ով կամովին խոնարհվում է Երկնային Տիրոջ առջև, նա ավելի զորեղ ու իմաստուն է դառնում: Հավարտ արարողության` հավատավոր հայորդիները միասնական աղոթք են կատարելու մասնակիցների և նրանց մերձավորների հոգևոր և մարմնավոր բժշկության, հարազատ հանգուցյալների հոգու փրկության, Հայոց ազգի, նաև պահապան զինվորների համար: «Այս օրենքների գիրքը քո շուրթերից չհեռացնես, այլ գիշեր-ցերեկ դրա մասին մտածի՛ր, որպեսզի գիտենաս կատարել բոլոր դրա մեջ գրվածները. այն ժամանակ հաջողակ կլինես, ուղիղ ճանապարհով կընթանաս և խելամտորեն կգործես։ Ահա պատվիրում եմ քեզ, զորացի՛ր և արիացի՛ր, մի՛ վախեցիր և մի՛ երկնչիր, որովհետև քեզ հետ է քո Տեր Աստվածը ամէն տեղ, ուր էլ որ գնաս» (Յես 1: 8-9): |