Վերջերս կայացավ «Ոչ պետական բուհերի ուսանողական կենտրոն» հասարակական կազմակերպության՝ «Սպորտային խաղեր 2018» խորագիրը կրող միջբուհական մարզական խաղերը: Մրցույթն ընդգրկում էր տարբեր մարզաձևեր: Առաջնության բազկամարտ մարզաձևում իր մասնակցությունն ունեցավ նաև Ավանդական բժշկության համալսարանի ներկայացուցիչ Հովհաննես Մանասյանը՝ գրավելով 3-րդ պատվավոր տեղը:
«Պայքարն այնքան էլ դյուրին չէր, մասնակցում էր ոչ պետական 9 բուհի ավելի քան 150 ուսանող, իսկ բազկամարտին՝ մոտ 20 ուսանող: Հպարտ եմ, որ կարողացա բարձր պահել Ավանդական բժշկության համալսարանի պատիվը», -նշեց ստոմատոլոգիական ֆակուլտետի մագիստրատուրայի 2-րդ կուրսի ուսանող Հովհաննես Մանասյանը՝ տեղեկացնելով, որ հաղթողն ու մրցանակակիրները որոշվել են աջ և ձախ ձեռքով վաստակած միավորների հանրագումարով:
Նշենք, որ Ավանդական բժշկության համալսարանը հետամուտ է բազմաբնույթ ներբուհական միջոցառումների անցկացմանը, այդ թվում՝ լողի, շախմատի և այլ մարզաձևերից: Միջոցառումները նպատակ ունեն ակտիվացնել ուսանողական կյանքը՝ դարձնելով ուսանողների առօրյան զանազան ու բովանդակալից, ինչպես նաև՝ խթանել ուսանողների հետաքրքրվածությունը առողջ ապրելակերպի շրջանակներում: Համալսարանն այն շարժիչ ուժն է, որն ուսանողներին մղում է զարգանալու և զարգացնելու ոչ միայն միտքը, այլև՝ մարմինը: