Առավոտյան 07. 08 րոպե: Խորը քնի մեջ լսվում է դռան չդադարող թակոցները: Կիսափակ աչքերով մի կերպ հասա դռանը ու… - Անուշիկենց տունն ա՞: - Ի՞նչ Անուշիկ, տո՛ Անուշիկն էլ, տո՛ դու էլ…ամբողջ գիշեր չեմ քնել… - Կներեք, հեռագիր է, սխալմամբ մեր տուն են բերել, մահամերձ հայրն է ուղարկել, երեխաներիս թողած ուզում եմ գտնել հասցեատիրոջը, սա 2-րդ բնակարա՞նն է - Ո՛չ, 2-ի ՛՛բ՛՛-ն է: Առավոտյան 08. 30 րոպե Աշխատանքի գնալու զզվելի ժամ: Հայացքդ տխուր սահում է մեքենայիդ իջեցված անվադողերին: Երեխաների անմեղ խաղ…տո՛ երեխաներն էլ, տո՛ աշխատանքն էլ, տո՛ իրանց մամաներն ու պապաներն էլ հետը: Ժամը 10.20 րոպե (աշխատանքից ուշացած) Օֆիսի տնօրեն տիկին Հռիփսիմեի - այրու ծակո՜ղ, անխո՜ս հայացքը, աշխատակիցների կցկտուր լսվող Փաշինյան- չգիտեմ ում հակամարտության քաղաքական, Հանրապետության համար արժեքավոր կարծիքները, քարտուղարուհու հեռախոսային խոսակցությունը ինչ-որ ընկերու հետ հակաբեղմնավորիչների մասին: Տո՛ դուք էլ, ձեր աշխատա՛նքն էլ, հակահեղափոխությո՛ւնն էլ, հակաբեղմնավորիչնե՛րն էլ: ժամը 18.45 րոպե Արդեն 30 րոպե կլինի սպասում եմ երթուղային տաքսու: Գալիս, առանց կանգ առնելու, մինչև վարդապետի խազը բարձված մարդկանցով, օրորվելով աջից-ձախ հեռանում են - քաղաքապետին, տրանսպորտային վարչությանը, ավտոբուս արտադրող Հուգարիային, ԳԱԶԵԼ արտադրող Ռուսատանին, գծատերերին հասնող հայհոյանքների մի ամբողջ փնջով: Ժամը 00.00 (Ազնվության ժամանակը) Երկար մտածեցի թե այս ամենի մեջ ո՞վ է մեղավոր՝ Հունգարիա՞ն, Ռուսաստա՞նը, քաղաքապետարա՞նը, այրի տնօրե՞նը, թե՞ ազնիվ մղումներով առավոտյան քունս խանգարող այն կինը… Բնակա՜ն է, որ մեղավորը ե՜ս էի: Հ.Գ. Հիշեցի, թե ինչպես մի քանի օր առաջ, բակի երեխաներին սովորեցնում էի թե ինչպե՞ս կարելի է փուչիկ փչել, օգտվելով ավտոմեքենայի անվադողերից: |