Հայ Առաքելական եկեղեցու դերը հայ ժողովրդի պատմության և մշակույթի, հայ ինքնության պահպանման մեջ անգնահատելի և անուրանալի է: Հայ Առաքելական եկեղեցին վեր է սոսկ հոգևոր հաստատություն լինելուց և հայերիս համար այն նաև ազգային արժեք է, հայ ինքնության մի մասը: Ամենայն Հայոց Կաթողիկոսության վարչական կենտրոնը Մայր Աթոռ Սուրբ Էջմիածինն է:

Ցավով արձանագրում ենք, որ ներկայիս Ամենայն հայոց կաթողիկոս հռչակված Գարեգին Բ-ն բավարար հասունություն, լրջություն, գրագիտություն, խոհեմություն և առաքինություն չի ցուցաբերում՝ արհամարհելով Հայ Առաքելական եկեղեցու կարևորությունն ու իր ուսերի վրա դրված ողջ պատասխանատվությունը: Հայոց պատմությունից մեզ հայտնի երանելի հոգևորականների և սուրբ հայրապետների համեմատությամբ Գարեգին Բ-ն ուղղակի առաջնորդվում է հակաքրիստոնեական արժեքներով՝ հային հեռացնելով իր մայր եկեղեցուց և պատճառ դառնալով անթիվ հոգիների կործանման:

Մասնավորպես, Հայ Առաքելական եկեղեցու ներկայիս կոռումպացված լինելը, ժողովրդի և եկեղեցու միջև առաջացած խորն անջրպետը, հայկական գործող ու խոնարհված եկեղեցիների կիսավեր ու ապականված ներկայիս վիճակը, կաթողիկոսի ստեղծած բռնապետական համակարգը և մի շարք այլ հանգամանքներ մեզ թույլ են տալիս պահանջելու նրա հրաժարականը կամ գահազրկումը:

Անհարիր է մեր եկեղեցուն ունենալ այսպիսի հոգևոր առաջնորդ, ով մինչ օրս չի կարողացել հիմնավոր պատասխաններ տալ հանրությանը հուզող բազմաթիվ հարցադրումներին՝ փոխարենը զրպարտելով ու վարկաբեկելով այն անձանց, ովքեր համարձակվել են բարձրաձայնել եկեղեցու խնդիրներն ու քննադատել կաթողիկոսին:

Ուստի ինքնակամ հրաժարական չտալու դեպքում՝ Ազգային-Եկեղեցական Ժողովից պահանջում ենք Հայ եկեղեցուց հեռացնել Գարեգին Բ կաթողիկոսին, ով հանդիսանում է սերժական ռեժիմի անբաժանելի կցորդը: Եպիսկոպոսաց դասից պահանջում ենք վերականգնել Հայ Առաքելական եկեղեցու երբեմնի դերն ու հեղինակությունը հայ ժողովրդի ինքնության կողմնորոշման և արժեքների վերաիմաստավորման այս դժվարին ժամանակաշրջանում:

Ավելորդ չենք համարում նշել, որ սույն նախաձեռնությունը միմիայն հայ ժողովրդի և եկեղեցու զավակների պայքարն է: Հետևաբար, այն անձինք ու կազմակերպությունները, որոնք հետապնդում են վերոնշյալից զատ այլ նպատակներ, խնդրում ենք չմիջամտել և չնույնականացվել այս շարժման հետ, քանի որ հարցն առավել քան խորքային է և միտված է Հայ Առաքելական եկեղեցու առողջացմանն ու մաքրությանը:

«Մերժի՛ր Սերժի Գարեգինին» նախաձեռնության անդամներ