Եվրոպայի մինչև 18 տարեկանների առաջնության ընտրական փուլում հաճելի անակնկալ է մատուցել Հայաստանի հավաքականը: Լատվիայի մայրաքաղաք Ռիգայում ընթացող ընտրական փուլի քառորդ եզրափակչում Հայաստանը 13:10 հաշվով առավելության է հասել Հունգարիայի նկատմամբ ու դուրս եկել կիսաեզրափակիչ:
Այս հաղթանակի շնորհիվ Հայաստանն ապահովել է իր տեղը Եվրոպայի առաջնության եզրափակիչ փուլում, որը կայանալու է օգոստոսի 22-ից 23-ը` Բելառուսի մայրաքաղաք Մինսկում: Եվրոպայի առաջնությանը մասնակցելու են «Հին աշխարհամասի» ուժեղագույն 16 երկրները, որոնց թվում է նաև Հայաստանը, հայտնում է Հայաստանի բասկետբոլի ֆեդերացիան: