«Ոսկե ծիրան» երևանյան միջազգային կինոփառատոնն այս տարի, ի տարբերություն նախորդ տարիների, հրաժարվել է Օպերային թատրոնում շքեղ բացման արարողությունից: Փառատոնի հիմնադիր տնօրեն Հարություն Խաչատրյանի խոսքով` այս տարի շատ ծանր տարի էր ոչ միայն հայ ժողովրդի, այլև իրենց փառատոնի համար. «Ամեն ինչ ազդում է փառատոնի վրա: Հաշվի առնելով Հայաստանում ստեղծված իրավիճակը , շատերը վախենում էին գալ Հայաստան, բայց փառք Աստծո այս թիմը կարողացել է հաղթահարել շատ խնդիրներ հրավիրելով լավագույն մարդկանց, լավագույն ժյուրիին և հանրության դատին հանձնել լավագույն ֆիլմերը»: Հարություն Խաչատրյանի փոխանցմամբ` «Ոսկե ծիրանի» շրջանակում կնշվեն Ռուբեն Գեւորգյանցի, Ռոման Բալայանի հոբելյանները, ինչպես նաև կբացվեն Էդմոնդ Քյոսայանի, Ալբերտ Յավուրյանի, Դմիտրի Կեսայանի աստղերը: Հիշեցնենք, որ այս տարի «Ոսկե ծիրան» Երևանի միջազգային 13-րդ կինոփառատոնը կանցկացվի հուլիսի 10-17-ը: Փառատոնն այս տարի նվիրված է Հայաստանի անկախության 25-ամյակին:
|