«Իմանալով, որ սեռական այլ կողմնորոշում ունեմ, ինձ ճնշում են ու ծաղրում: Այսօրվանից անժամկետ հացադուլ եմ հայտարարում»,- MAMUL.am-ի թղթակցի հետ զրույցում ասաց «Կոշ» քրեակատարողական հիմնարկի դատապարտյալ Արթուր Մելիքյանը: Վերջինը տեղեկացրեց, որ քիչ առաջ «Կոշ» քրեակատարողական հիմնարկի հսկիչներից մեկի հետ վիճաբանություն է ունեցել. ««Նուբարաշեն» ՔԿ-ում էլ մի անգամ ծեծկռտուք եղավ, այլևս չեմ կարողանում նման պայմաններում պատիժս կրել: 19 տարեկան եմ, այո, սեռական այլ կողմնորոշում ունեմ, բայց դա չի նշանակում, որ ինձ պետք է հոգեպես ճնշեն»: Արթուրը տեղկացրեց, որ իր այդ խնդրի պատճառով հինգ անգամ ինքնավնասում է արել. «Լինում են պահեր, որ իրենց ագրեսիվ վերաբերմունքի պատճառով ուզում եմ կյանքիս վերջ տամ, բայց ես էլ եմ մարդ և ապրելու իրավունք ունեմ»:

Տեղեկացնենք, որ անչափահաս տարիքում Արթուր Մելիքյանը Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով դատապարտվել է 3 տարի 11 ամիս 25 օր ժամկետով ազատազրկման՝ մեղավոր ճանաչվելով գողության համար առաջադրված մեղադրանքով: