Այսօր տեղի է ունեցել «Հայկական վերծանունդ» կուսակցության երկրորդ հերթական համագումարը: Հմագումարի ժամանակ հայտարարվել է, որ համամասնական ցուցակը ղեկավարելու է Արթուր Բաղդասարյանը և ընտրություններին գնալու են միայնակ:
«Սա թաղի տղերքի, քրեական հեղինակությունների ընտրություններ չեն։ ԸՕ-ն լաց է լինում որոշների համար։ Մենք «ոչ» ենք ասում մարզերում զանգվածային ցուցակագրումներին, պետք է իմանալ, որ ընտրակաշառքով ձեռք բերված քվեով նրանք դատապարտում են իրենց ընտանիքը»,- ասել է Արթուր Բաղդասարյանը: Համագումարին փոխնախագահ Հեղինե Բիշարյանը հայտարարել է, որ «կփշրի նրանց մատները», և իր «մատներով կհանի նրանց աչքերը», ովքեր կփորձեն վարկաբեկել ՀՎԿ-ն:

Ըստ Հեղինե Բիշարյանի, այս ընտրություններին որոշվելու է իրենց ապագան: «Սա թաղի «խառոշի» տղերքի ընտրություն չէ, ամեն մի «քուչա» այսօր ռեյտինգային մարդ ունի, այս ի՞նչ երկրում ենք ապրում, մինչդեռ կառավարող իշխանության մեջ ռեյտինգ չկա, սա է տարբերությունը: Մեզ անհրաժեշտ են այս ընտրություններով երկրում իշխանություն փոխել, գաղափարախոսական փոփոխություն է անհրաժեշտ: Եկել է ժամանակը, որ ժողովուրդն իր քաղաքական կամքը թելադրի այն իշխանություններին, այն մարդկանց, ովքեր տարիներ շարունակ ծնկի են բերել մեզնից յուրաքանչյուրին»,- ասել է Բիշարյանը: