2011թ. ՀՀ մշակույթի նախարարության և Իտալիայի ԱԳՆ-ի միջև կնքվեց փոխադարձ համաձայնագիր, ըստ որի` Իտալիայից եկած մասնագետները շուրջ երկու տարի վարպետության դասընթացներ կանցկացնեն ճարտարապետական վերականգնման ոլորտի նախագծման, որմնանկարների իրականացման, շինհրապարակի կազմակերպման վերաբերյալ:

Ներկայումս «Օժանդակություն տեղական հաստատություններին մշակութային պահպանման ու վերականգնման ոլորտում» կրթամշակութային ծրագրի շրջանակներում իտալացի մասնագետները ուսումնասիրություններ են կատարում Արագածոտնի մարզի Արուճ գյուղի Սուրբ Գրիգոր եկեղեցին: Նախկինում կատարված պեղումների ընթացքում տաճարի հարավարևելյան կողմում բացվել են Արուճի պալատի մնացորդները: Այն կրկնում է Դվինի կաթողիկոսական պալատի հորինվածքը: Եկեղեցին կառուցվել է 662-666 թվականներին` Գրիգոր Մամիկոնյանի պատվերով:

Ծրագրի շրջանակներում կվերականգնվեն Արուճի որմնանկարները. ընթանում են որմնանկարների ամրակայման աշխատանքները, իսկ մինչև 2014թ. նախատեսվում է դրանց ամբողջական վերականգնումը: