"Ազատ դեմոկրատներ" կուսակցությունը օրեր անց կայանալիք Երեւանի ավագանու ընտրություններին սատարելու է "Հայ հեղափոխական դաշնակցություն" կուսակցությանը` իրենց համակիրներին ուղղորդելով դեպի ՀՅԴ: Դաշնակցության վերնախավին նման հավաստիացում է տվել "Ազատ դեմոկրատներ" կուսակցության անդամ, ԱԺ պատգամավոր Ալեքսանդր Արզումանյանը: Սույն տեղեկությունները ԳԱԼԱ-ի լրագրողի հետ զրույցում, ըստ էության, չի հերքել Ալեքսանդր Արզումանյանը: Վերջինս նշել է. "Կուսակցության անունից չեմ կարող ասել, իմ անունից կարող եմ ասել` գուցե շատերի համար անսպասելի լինի, այո´, ծանր- թեթեւ անելով` ես ինքս որոշել եմ, որ իմ ձայնը տալու եմ Դաշնակցությանը": Հարցին, թե կուսակցության համակիրներին եւս ուղղորդելո՞ւ է դեպի Դաշնակցություն կուսակցություն, Ալեքսանդր Արզումանյանը նշել է, որ նման քննարկում չի եղել: ԱԺ պատգամավորը չի բացառել, որ իր որոշումը, ամեն դեպքում, կազդի "Ազատ դեմոկրատներ" կուսակցության համակիրների որոշման վրա: Նշենք, որ մինչ առաջադրումները, տեղեկություններ շրջանառվեցին այն մասին, որ "Ազատ դեմոկրատները" եւ ՀՀ նախկին վարչապետ Հրանտ Բագրատյանի ղեկավարած "Ազատություն" կուսակցությունը Երեւանի ավագանու ընտրություններին միասնական դաշինքով հանդես կգան, սակայն պայմանավորվածությունն այդպես էլ չկայացավ: |