Աղվան Մինասյան քաջամարտիկը մերն է, մեր Սիսիանինն է, համայն հայության քաջորդին է: Աղվա’ն, դու հավերժի փառքն ես, դու միշտ կապրես մեր սրտերում, քաջառյուծ Աղվան: Մայիսի 10-ին Սիսիանի Համո Սահյանի անվան մշակույթի տանը կայացավ ասմունքի փառատոն` նվիրված սիսիանցի զոհված ազատամարտիկ, երիտասարդ բանաստեղծ Աղվան Մինասյանին: Մրցույթը կազմակերպել էր ԵԿՄ Սիսիանի վարչությունը: Սիսիանի ավագ դպրոցի մասնագիտացված կրթական աջակցությունների գծով տնօրենի տեղակալ Հասմիկ Վարդանյանի, հայոց լեզվի ուսուցչուհի Նարա Հովհաննիսյանի կազմակերպմամբ մեր դպրոցի աշակերտները ևս մասնակցեցին այդ միջոցառմանը և հաղթանակներ ունեցան: Մրցույթին մասնակցեցին Սիսիան քաղաքի դպրոցները: Սիսիանի ավագ դպրոցը ներկայացավ գրական – երաժշտական սցենարով: Աշակերտները ներկայացրեցին Աղվանի կյանքն ու ստեղծագործությունները, հանդես եկան հրաշալի ասմունքով և նրա ստեղծագործության հիման վրա գրված երգով: Ելույթն ավարտեցին Աղվանի գործին հավատարմության երդումով: Մրցանակային երկրորդ տեղը գրավեց Աշխեն Հունանյանը, պրոֆեսիանալ կատարման համար ժյուրիի համակրանքին արժանացավ Աստղիկ Գեւորգյանը և լավագույն դպրոց մրցանակին արժանացավ Սիսիանի ավագ դպրոցը: ԵԿՄ վարչության կողմից հաղթողներն արժանացան դրամական պարգեւների, դպրոցները` DVD-ների եւ դիպլոմների: Ամփոփելով Աղվան Մինասյանի անվան ասմունքի մրցույթը` ԵԿՄ փոխնախագահ Հրաչ Կարապետյանն ասաց, որ այն կդառնա ավանդական, որին այսուհետ կմասնակցեն նաեւ գյուղական դպրոցները: |