Գերմանիայի կանցլեր Անգելա Մերկելը հայտարարել է, որ ՌԴ նախագահ Վլադիմիր Պուտինը «Մեծ յոթնյակ»-ի հաջորդ գագաթնաժողովին մասնակցելու որևէ հեռանկար չունի: Ինչպես հաղորդում է «Ռոյթերս»-ը, գագաթնաժողովն անցկացվելու է այս տարվա հունիսին՝ Բավարիայում: ««Մեծ յոթնյակ»-ը, որը նախկինում «Մեծ ութնյակ» էր, միշտ դիտարկվել է որպես համընդհանուր արժեքների միություն, իսկ Ղրիմի միացումը Ռուսաստանին և Ուկրաինայում տեղի ունեցող դեպքերը միջազգային իրավունքի կոպիտ խախտումներ են, որոնք ոտնահարում են մեր արժեքների համակարգը»,- հայտնել է Մերկելը գերմանական թերթերից մեկին տրված հարցազրույցի ժամանակ: Գերմանիայի կանցլերը հայտնել է, որ քանի որ Պուտինը ոտնահարել է իրենց արժեքների համակարգը, ուստի նա որևէ շանս չունի մասնակցելու «Մեծ յոթնյակ»-ի հաջորդ գագաթնաժոովին: Մերկելը նաև նշել է, որ իրենք դեռևս չեն պատրաստվում հանել Ռուսաստանի դեմ կիրառված պատժամիջոցները, քանի որ դրանք վերացնելու համար առաջ քաշված պայմանները դեռևս չեն կատարվել Ռուսաստանի կողմից: «Դատելով ստեղծված իրավիճակից՝ պատժամիջոցները դեռևս շարունակելու են ուժի մեջ մնալ: Ավելին՝ մենք մարտի սկզբին քննարկում ենք անցկացնելու և որոշենք՝ արդյոք նոր պատժամիջոցներ ենք կիրառելու Ռուսաստանի հանդեպ, թե` ոչ»,- հայտնել է Մերկելը: |