American Dream հայտնի լիմուզինն ի սկզբանե ստեղված է եղել ֆիլմի նկարահանումների ժամանակ: Այն մինչ օրս մնում է Գինեսի ռեկորդների գրքում՝ որպես աշխարհի ամենաերկար ավտոմեքենա: Դրա երկարությունը 30,4 մետր է, անիվների քանակը՝ 26: Հեղինակը հատուկ պատվերներով աշխատող վարպետ Ջեմ Օրբերգն է եղել: Այն ստեղծվել է 80-ական թվականներին: Ի թիվս բազում այլ հարմարավետությունների՝ այս լիմուզինի ներսում կա նաև ջակուզի ու լողավազան: Իսկ մեքենայի հետևում կա ուղղաթիռային հարթակ:

Առաջին հարցը, որ ծագում է այս մեքենան տեսնողների մտքում, այն է՝ ինչպես է այն շրջադարձ կատարում: Անիվների կենտրոնական խմբից անմիջապես հետո կա «խզվածք», որտեղից մեքենան առանձնանում է ու կարող է շրջադարձեր կատարել ավտոգնացքի նման: Ստացվում է, որ լիմուզինի հետևի հատվածը կցորդն է: Առջևի հատվածից հնարավոր չէ առանց մեքենայից իջնելու հասնել ետևի հատված, փոխարենը, հնարավոր է կցորդն առանձնացնել ու երթևեկել կարճ տարբերակով:

Այնուամենայնիվ, մեքենան նախատեսված չէ ստանդարտ ճանապարհների համար և նկարահանումների վայրեր տեղափոխելիս այն մասնատել են 2 մասի և տեղափոխել բեռնատարներով:
2012-ին արդեն այս մեքենան, որ այլևս չէր նկարահանվում ոչ մի կինոյում, վատ վիճակում էր գտնվում: Սակայն 2014-ին այն գնել է ավտոմեքենաների Autoseum թանգարանը: «Ամերիկյան երազանքն» այժմ վերանորոգվում է: